ရခိုင်ရိုးမတွင်းက နတ်ရေကန်ဗျူဟာကုန်း အနီးက နတ်ရေကန် MPT တာဝါလို့ လူသိများတဲ့ ဆက်သွယ်ရေးစခန်းကို အာရက္ခတပ်တော်က မနေ့ည ပိုင်းက သိမ်းပိုက်လိုက်တယ် လို့ သတင်းရရှိပါတယ်။

စစ်ကောင်စီရဲ့ MPT တာဝါကုန်းစခန်းကို AA ဘက်က မနေ့က ဇွန်လ ၃ရက်နေ့မှာ သိမ်းပိုက်နိုင်ခဲ့တာဖြစ်တယ်လို့ မြေပြင်စစ်ရေး သတင်းရင်းမြစ်တစ်ယောက်က လေးဝတီ FM ကို ပြောပါတယ်။

” တာဝါတိုင်စခန်းကုန်းကပြတ်သွားပြီလို့ ပြောလို့ရပါတယ်။ ကာကင်းတွေကိုသိမ်းပြီးသိပ်မကြာပါဘူး စခန်းကုန်းတခုလုံးကိုရသွားတာ။ စစ်ကောင်စီဘက်ကတော့ အသေအပျောက်များတယ်။ လက်နက်ခဲယမ်းတွေလည်းရထားပါတယ် အခု နတ်ရေကန်ဗျူဟာမှာ လေကြောင်းရန်ကာကွယ်ရေးစခန်းတစ်ခုပဲ ရှိတော့တယ် ” လို့ ဆိုပါတယ်။

နတ်ရေကန်ဗျူဟာပေါ်က စခန်းကုန်းတွေကို သိမ်းပိုက်ခံရပြီးနောက်မှာ စစ်ကောင်စီဘက်က နှစ်ရက်ဆက်တိုက် လေကြောင်းက ပြင်းပြင်းထန်ထန် လာရောက် တိုက်ခိုက်နေတယ်လို့ ဆိုပါတယ်။

“စကစ ဘက်က အထိလည်းနာနေတယ်။ ဒါကြောင့် လက်နက်တွေတရစပ်ပစ်ခတ်နေတယ်။ ဂျက်တွေလည်းဝဲနေတယ်” လို့ သတင်းရင်းမြစ်က ပြောပါတယ်။

​ဖေ​ဖော်ဝါရီလဆန်းပိုင်း က စပြီး ကံမြင့်ကန်၊နတ်​ရေကန်ဗျူဟာစခန်း၊ကာကင်းစခန်းများကို AA ကထိုးစစ်ဆင်တိုက်ခိုက်ရာ ထိ​တွေ့တိုက်ပွဲတွေဖြစ်လာခဲ့တာဖြစ်ပါတယ်။

အာရက္ခတပ်တော်(AA)နဲ့ ပူး​ပေါင်းမဟာမိတ်တပ်တွေက အမ်း-ပဒါန်းလမ်းမပိုင်းကိုပိတ်ဆို့ထားပြီး စစ်ကောင်စီဘက်က နတ်ရေကန်ဗျူဟာ က နေ ထိုးစစ်ဆင်နေတာဖြစ်ပါတယ်။

အာရက္ခတပ်တော်ဘက်က အပစ်အခတ်ရပ်စဲ(၁)လထပ်တိုးကြောင်း ထုတ်ပြန်ထားပြီးနောက် ထိုးစစ်ရပ်တန့်ခဲ့ပေမယ့်

စစ်ကောင်စီရဲ့ တပ်မ(၉၉)ဦးဆောင်တဲ့ တပ်တွေဟာ ရခိုင်ရိုးမထဲက အသိမ်းခံထားရတဲ့နေရာတွေကို စစ်ကြောင်းထိုးလာတာဖြစ်ပါတယ်။

ရခိုင်ရိုးမတွင်း တိုက်ပွဲတွေ ဟာ မေလ ၂၄ ရက်နေ့ကတည်းက ပြန်လည်ပြင်းထန်လာတာဖြစ်ပြီး နတ်ရေကန်ဗျူဟာ နောက်က ကာကင်စခန်းကိုတော့ မေလ ၂၆ ရက်နေ့ မှာ အာရက္ခတပ်တော်ဘက်က သိမ်းပိုက်ခဲ့ပါတယ်။

နတ်ရေကန်ဗျူဟာဝန်းကျင်မှာ တိုက်ပွဲဖြစ်ပွားနေတဲ့ အတွက် ပဒန်းဘက်က အဝင်အထွက်တွေကိုလည်း စစ်ကောင်စီက ပိတ်ထားပါတယ်။ ရခိုင်ရိုးမပေါ်မှာ ရှိတဲ့ စစ်ကောင်စီစခန်းတွေကို အာရက္ခတပ်တော်ဘက်က အမ်းမြို့သိမ်းတိုက်ပွဲပြီးကတည်းက ဆင်နွဲနေတာဖြစ်ပါတယ်။

အဉ္စနလီညှင်း လေး၀တီFM