ရခိုင်ပြည်နယ် သံတွဲမြို့နယ်ထဲ က ကျေးရွာတွေက လူငယ်တွေ အဓမ္မ မဲနှိုက်ခိုင်းပြီး ငပလီ ၅၅
တပ်ရင်းမှာ စစ်ကောင်စီက စစ်သင်တန်းပေးနေတယ် လို့ သတင်းရရှိပါတယ်။
ဒီစစ်သင်တန်းမှာ အဓမ္မစစ်သားစုဆောင်းခံရတဲ့ ပြည်သူ ၂၀၀ ကျော်ပါဝင်ပြီး တစ်ရွာကို ၁၀
ဦးကနေ ၁၅ ဦးပါဝင်တယ်လို့ ပြောပါတယ်။
\”ကိုယ့်ရွာကိုယ် ကင်းစောင့်ရမယ် ၊ ကာကွယ်ရမယ်ဆိုပြီး မဲနှိုက်ခိုင်းပါတယ် ၊ တခြားမြို့မှာ
အလုပ်သွားလုပ်နေတဲ့သားက မဲ ပေါက်တယ်၊ ဒါပေမယ့် AA ဘက်ကို ဝင်မယ် ဆိုပြီး သူအလုပ်
လုပ်နေတဲ့ နေရာက နေ လမ်းကြောင်းရှာပြီး ထွက်သွားတယ် ၊ သူ့အမေက လည်း သူတို့
ဘက်ဝင်ရမယ့် အတူတူ ၊ AA ဘက်ပဲ ဝင် လို့ ပြောလိုက်တယ် နိုင်ငံရေးတွေ ဘာတွေ
တော့မသိဘူး၊ ချမယ်ချတော့ AA ဘက်ကပဲ ချမှာပဲ \” လို့ သံတွဲမြို့နယ် ပိုင် ကျေးရွာမှ
ဒေသခံတစ်ဦး ကပြောပါတယ်။
သံတွဲမြို့ပေါ်ရပ်ကွက်တွေ နဲ့ အတူ သံတွဲ-သပြုချိုင်ရေတပ် စခန်း တောက်လျှောက်က ကျေးရွာ
၁၅ ရွာ က ပြည်သူတွေကို ရပ်ကျေးဥက္ကဌ တွေက တဆင့် မဲနှိုက်ခိုင်းနေတယ်လို့ ပြောပါတယ်။
\”ဟိုရက်က စစ်ကားတွေ ရွာထဲ ဝင်လာတော့ ကလေးတွေ ၊ အကုန်ထွက်ပြေးကြတယ်၊ ရေတပ်က
လည်း လက်နက်စမ်းတယ် ဆိုပြီး အမြှောက်တွေ ပစ်နေတယ် \” လို့ သပြုချိုင်ရေ တပ်အနီး
ကျေးရွာ တစ်ရွာက ဒေသခံတစ်ဦးကပြောပါတယ်။
ငပလီအခြေစိုက် ၅၅ ၊ ၅၆၆ တပ်ရင်း တွေ ရှိပြီး ၊ ငပလီနဲ့ မိုင် ၂၀ ကျော် အကွာမှာ တော့
စစ်ကောင်စီအထိုင်ချ ရေတပ်စခန်းတစ်ခုရှိနေပါတယ်။
ရခိုင်ပြည်နယ် တောင်ကုတ်၊ သံတွဲ၊ ဂွ နဲ့ အမ်းမြို့နယ်တို့မှာ စစ်ကောင်စီက ထိမ်းချုပ်မှု
ပီပြင်စွာရှိဆဲဖြစ်ပြီး ဒေသခံတွေကို အသုံးချနေတာဖြစ်ပါတယ်။
ရခိုင့်တပ်တော် AA က ရခိုင်ပြည်နယ် တစ်ဝှမ်းလုံး မှာ စစ်ကောင်စီ ကင်းစင်နယ်မြေ အဖြစ်
တိုက်ခိုက်သွားမယ်လို့ ကြေညာထားတဲ့ အတွက် ခံစစ်ပြင်ဆင်ရာမှာ ဒေသခံ
လူအရင်းအမြစ်တွေကို စစ်ကောင်စီက အသုံးပြုနေတာ ဖြစ်ပါတယ်။